Буряадай толгойлогшын уялгануудые дүүргэгшэ Алексей Цыденов инвестиционно байдал һайжаруулха талаар соведэй зүблөөнэй үедэ «Россин тулга» гэһэн региональна таһагта Буряадай засагай түлөөлэгшэдэй хэр бизнес дэмжэдэгые сэгнэхыень дурадхаа.
«Тиихэдээ өөрһөөм эхилээд, сайдуудые, аймагуудай толгойлогшод хүрэтэр харагты, олзын хэрэг эрхилэгшэдтэй харилсаанда мүн тэдэнэй бизнес дэмжэхээр хэр бэлэн бэ гэжэ элирүүлхэ хэрэгтэй»-гээд тэрэ ойлгуулаа.
Буряадай толгойлогшын даабаряар, «Россин тулга» гэһэн Буряадай региональна таһагай түрүүлэгшэ Валентина Намсараева мэдээсэхэдээ, олзын хэрэг эрхилэгшэдэй ниитэ эмхи хадаа ондоо регионуудта иимэрхүү ажал ябуулха дүй дүршэл бии гэжэ хэлээ.
Тэмдэглэмээр юуб гэхэдэ, байрын засагуудай олзын хэрэг эрхилэлгые хүгжөөхэ гол зорилгонуудые бэелүүлгэдэ хэр бэлэн байһан асуудал 2016 ондо комплексно гэхэ гү, али гүйсэд дүүрэн дорожно каартаар нэбтэрүүлэгдэдэг үндэһэтэнэй рейтингын «Бага олзын хэрэг эрхилэлгэ» болон «Бизнестэ административна дарлалта үзүүлгэ» гэһэн эрхим дүй дүршэлнүүдые зүбшэлгын үедэ харагдаа. Тиихэдэ дунда болон бага олзын хэрэг эрхилэлгые дэмжэхэ талаар болон хиналта-шалгалтын ажаябуулгануудые эрхилэлгээр дорожно каартын тусхайлагдамал хэбүүдые хэрэглэхэ гол зорилгонууд хэр бэелүүлэгдэжэ байнаб гэжэ зүбшэгдөө.
Энээнһээ гадна, Алексей Цыденовай тус соведэй зүблөөнэй дүнгөөр үгэһэн хэдэн даабаринууд соо уласай промышленностиин болон «Россин тулгын» сайтнуудта Буряадай бизнес дэмжэхэ талаар бүхы мэдээсэлнүүдые хабсаргаха тухай заабари оролсоо.