Мартын 31-дэ Иволга тосхоной хажууда ойн түймэрнүүдые сараха талаар олон шэглэлэй һуралсал болоо.
Энэ хэмжээ ябуулгада Рослесхозой хүтэлбэрилэгшэ Иван Валентик, Буряад уласай толгойлогшын уялгануудые дүүргэгшэ Алексей Цыденов болон МЧС-эй Буряадай гол управлениин даргын уялгануудые дүүргэгшэ Костантин Григорьев, агаараар ой харуулдаг федеральна албанай түймэр саралгын десантнигууд болон олондо мэдээсэл тараадаг хэрэгсэлнүүдэй түлөөлэгшэд хабаадаа.
Тэдэ ойн түймэрнүүдые сараха хэрэгтэ албан зургаануудай хоорондохи харилсаа холбоо сэгнэжэ, абтаха хэмжээ ябуулгануудай хэр аша үрэтэйгөөр, шууд түргэн гүйсэдхэлгые хаража үзөө.
Тиигэжэ урид зохеогдоhон хэбээр, түймэр сараха албанууд юрэ һанагдаһан ойн түймэр оложо, унтараалгадань нэн түрүүн ойн сарагшад гараа. Баймга, һуралсалай түсэбэй еһоор, гал дүлэнэй таралгада һаад ушаруулхаяа эгээ дүтын тосхон руу Авиалесоохрана хабаадуулагдана.
Гал дүлэ тогтоохын тула түймэрэй дүтэлжэ байгаа талмайда тракторнуудаар минерализованна полосанууд хахалагдана. Ойн түймэрэй заха автоцистернануудһаа, мотопомпонуудһаа, ойн гал унтараалсадаг ранцева гар түхеэрэлгэнүүдһээ уһан адхагдан сасагдана.
Түймэрэй тойрулагдаад тогтоогдоходо, аһажа байгаа газарнууд үшөө һайса унтараагдана.
Рослесхозой толгойлогшо Иван Валентик тэмдэглэхэдээ, энэ һуралсал хадаа ойн түймэрнүүдэй хаһа үнгэргэлгэдэ бэлдэхэ ехэ шухала шата болоо гэбэ.
«Ойн түймэрнүүд элдэб газарнуудта ушардаг шэнжэтэй. Теэд эгээл шухалань юуб гэхэдэ, албан зургаанууд хоорондын харилсаан жэншэдгүй нарин нягта байха еһотой. Ойн түймэр саража байгшад бэе бэеынгээ мүр мүрые ойлгожо, ямаршье һаа газарта аша үрэтэйгөөр хүдэлхэ уялгатай. Мүнөөдэрэй һуралсалда бидэ бүхы албан зургаануудай хоорондоо харилсаа холбоо һайтайгаар хүдэлхыень хараба гээшэбди, тэрэ тоодо нютагай муниципалитедууд, оперативна албангууд эмхитэйгээр ажаллаа. Энэ хадаа ажалаа яагаад зохеон ябуулха талаар һайн жэшээ болоно»- гээд Рослесхозой толгойлогшо сэгнэбэ.
Ойн ажахын уласай агенствые хүтэлбэрилэгшэ Александр Мартыновай тэмдэглэhээр, эрдэмтэдэй һанамжаар, ерэхэ зун урдахиһаараа лаб дээрэ байха зэргэтэй.
«2017 оной түймэрэй аюултай хаһада бэлдэхэ зорилготойгоор Буряадай правительство ойн түймэрнүүтэй тэмсэхэ талаар хэдэн хэмжээ ябуулгануудые үнгэргэнэ. Улас дотор анха түрүүшынхиеэ ойнуудые зоононууд болгохо талаар ажал ябуулагдаа болон хэлсээнүүдэй еһоор ой ашагладаг тодорхой хубааринуудаар ойн участогууд баталагдаа. Мүнөөдэрэй байдалаар, ойн эзэдтэй ойн түймэрнүүдые сараха 447 хэлсээн абтажа, тэдэнь 615 техникээр хабсаргагдана. Тиихэдэ зургаанууд хоорондын түсэб зохеон абтанхай», - гэжэ Мартынов хөөрөө.
2017 оной түймэрнүүдтэй тэмсэхэ хэмжээ ябуулгануудые дүүргэхэ талаар бэлэдхэл үшөө үнгэрэгшэ жэлдэ эхилһэн байна. Тодорхойлбол, намартаа минерализованна полосанууд хахалагдаа болон һэргылэлгын шатаалганууд хэгдэhэн байна.
Түймэрэй аюултай хаһада бэлдэхэ талаар мэдээсэл шагнаад, сурбалжалагшад Алексей Цыденовта региондомнай хэды ойн харуулшад бииб гэhэн асуудалтайгаар хандаба.
«Ойн харуулшадай тоо олошоруулха тухай асуудал саг үргэлжэ бодхоогдодог. Тэрээгээр шиидхэбэри абахань бэлэн бэшэ, гэбэшье өөрын дураар түймэр сараха дружинануудые байгуулха шиидхэбэри абтанхай. Тэдэниие олоор хабаадуулхада болоно, бидэ гуримшуулһан актнуудые абаабди, тэрээгээр һайн дуратай түймэр сарагшадай харгы болон хоол түлэгдэхэ. Минии һанамжаар, иимэ арга хэрэглэлгэ байдалые халта хүнгэрүүлхэ шэнжэтэй»,-гээд тэрэ тэмдэглэбэ.
Рослесхозой хүтэлбэрилэгшэ Иван Валентик мүн лэ мэдээсэхэдээ, эндэ һая ойн ажахын федеральна агенствын протоколдо гар табигдажа, тэрээгээр нөөсэ жасаһаа Алексей Цыденовай мэдүүлгээр, Буряадта һэргылэлгын хэмжээнүүдые ябуулха болон харуулай олоор үнгэргэгдэхын тула 50 миллион түхэриг һомологдохо.
«Энэ хадаа ойн түймэрэй хаһын түрүүшын шатые һайнаар дабаха хэрэгтэ горитой хубита болоно»,-гээд Валентин тэмдэглээ.
Алексей Цыденов харюудань баяраа мэдүүлбэ.
Ажаглалта: Буряад орон Россин регионууд сооһоо эгээл ехэ ой модотой, ойн түймэрэй талаар орео байдалтай регионуудай тоодо ородог. 2012 онһоо эхилжэ, Буряадай дэбисхэртэ һуурижанхай федеральна авиалесоохранын команда региондо жэл бүри ойн түймэрнүүдые сараха хэрэгтэ туһалдаг, хамһалсадаг үүргэтэй. Түймэр саралгын региональна болон федеральна албан зургаануудай хоорондоо харилсаа холбоотойгоор хүдэлһэнэй ашаар, 2012-2016 онуудта ойн түймэрнүүдэй нютаг һууринуудта гү, али экономикын объектнуудта хүрэхэ нэгэшье ушар үзүүлэгдээгүй.
Байгаалиин түймэрнүүдэй нютаг һууринуудта дүтэлхэ бүхы ушарнууд хадаа хүн зоной хүдөө ажахын, муниципальна байгууламжануудай, гүрэнэй газарай нөөсын хуурай ногоо шатааха үйлэнүүдэй дүн болоно.
Фото: «Номер один»