Уласай ниислэл субсидидэ хүртэдэг хотонуудай тобьегто оруулагдахада, Улаан-Үдэ-Эрхүү, Улаан-Үдэ-Шэтэ, Улаан-Үдэ-Новосибирск гэhэн шэглэлүүдээр авианиидэлгэнүүд арад зондо улам дүтэ гэхэ юм гү, хүнгэн боложо үгэхэ.
Тиихэдэ хямда сэнгүүдээр агаараар ниидэжэ ошохоор маршрудуудай тобьегто Сибириин болон Алас-Дурна зүгэй hууринууд болон аяншалгын эгээ эрилтэтэй таланууд оруулагдаа.
Россин засагай газар Улаан-Үдые холо болон хүрэхэдэ хүндэ регионуудта оршодог нютагуудай тобьегто оруулха Буряадай дурадхалые дэмжээ. Энээн тухай тогтоолдо 2017 оной мартын 27-до Россин Федерациин правительствын түрүүлэгшэ Дмитрий Медведев гараа табижа баталаа. Тиигэжэ мүнөө авиакомпанинууд Росавиаци руу саарһа дансануудаа эльгээжэ, шэлэhэн маршрудуудтаа субсидидэ хүртэхэ тухай хэлсээнүүдые баталха аргатай.
«Субсидинүүд биледүүдэй сэнгүүдые хямдаруулха, тиигэжэ региональна маршрутна утаһануудые хүгжөөлгэдэ нүлөөлхэ зэргэтэй. Энэнь хадаа республикын ажаһуугшадай авиахангалтануудта хүртэхэ аргануудые дээшэлүүлхэ»,- гээд Буряадай толгойлогшын уялгануудые дүүргэгшэ тоолоно.
Даб дээрээ «Ангара» гэhэн авиакомпани Эрхүүhөө Таксимо болон Нижнеангарск тосхонууд хүрэтэр субсидитэй рейснүүдые ябуулна. 2016 оной июль hарада эдэ шэглэлнүүд «хүрэхэдэ хүндэ» газарнуудай тобьегто орулагдаhан байгаа.