Буряадай толгойлогшын уялгануудые дүүргэгшэ Алексей Цыденов байгаалиин яаманда даабари үгэхэдөө, шэглэлэйнгээ зургаан руу ойн инспекторнуудаа олошоруулха нэмэлтэ мэдүүлгэ барихыень заагаа.
Ойн инспекторнууд хадаа ой тайгануудаар ябажа, харууһалдаг үүргэтэй гэжэ тэмдэглэлтэй. Тэрэнь ой ашаглалгые хинан шалгалтые улам шангадхана гээшэ. Тиигээдшье тайрагдаһан, үйлэдбэрилэгдэһэн, ашажа абаашагдаһан ой модон тухай тоололгын бүридхэл бүри шанартайгаар ябуулагдадаг болохо жэшээтэй.
Уласай толгойлогшын уялгануудые дүүргэгшын даабаряар, гүрэнэй ойн инспекторнуудай тоо хадаа Россин президент Владимир Путинай үгэһэн заабаринуудай еһоор, ноормо хүрэтэр хүргэгдэхэ еһотой болоно.
Уласай ойн ажахын агенствын хүтэлбэрилэгшэ Александр Мартыновай хэлэһээр, даб дээрээ нормативта хүргэхын тула үшөө 2 мянга 632 хүн хэрэгтэй. Дуталдаһан мэргэжэлтэдые хангахын тула нэмэри 1 миллиард 651 миллион түхэриг хэрэгтэй.
Буряадай толгойлогшын уялгануудые саг зуура дүүргэгшэ Алексей Цыденовай дуулгаһаар, 2017 оной апрель һарада байгаалиин яаманһаа ойн харуулшадые олошоруулха мэдүүлгээр харюу абтаха болзортой.
Энээнһээ гадна, Буряадай байгаалиин яаман Россин ойн, тиихэдэ Россин Федерациин административна хуули еһонууд тухай кодекснуудта хубилалтануудые оруулхаар дурадхаа. Зорилгонь гэхэдэ, гүрэнэй нэгэдэмэл автоматизированна мэдээсэлэй системэ руу уялгата еһоор ой модоной бүридхэл оруулагдажа байха. Тиихэдээ бодото дээрээ хэды модон тайрагдааб, хэдынь саашаа болбосоруулагдааб, хэдынь ашагдажа наймаалагдааб гэһэн хамаг мэдээн харагдажа байха.