Буряадай толгойлогшын уялгануудые дүүргэгшэ Алексей Цыденов уласайнгаа засагай газарай түлөөлэгшэдтэй хамта 3 хоног хойто зүгэй дэбисхэрээр ябажа, хэдэн предприятинуудта хүрөөд, ажаһуугшадтай уулзаа.
Романовкада Алексей Цыденов ТОСуудай эдэбхитэдтэй харилсаад, нютагай ажаһуугшадтай, олзын хэрэг эрхилэгшэдтэй уулзаа, эмшэлгын амбулатори хараад, мал ажахые хүгжөөхэ асуудалаар хэлсээ.
Буряадай толгойлогшын уялгануудые саг зуура дүүргэгшэ Багдаринай эвенк арадай һургуули-интернат хараа, «Хиагдада» холдингын «Атомредметзолото» гэжэ бүлгэмэй генеральна директор Владимир Верховцевтай уран олзоборилдог тус предприятиин социально-экономическа программые зүбшөө, Озернын ГОК ошожо хараа.
Нютагаархидай тон ехээр һанаа зобооһон асуудалнууд гэхэдэ, эмшэлгын болоод транспортна хангалтануудые һайжаруулга, һургуули сэсэрлигүүдые, мүн больниисонуудые шэнэлэлгэ болоно. Тиин уулзалгада зарим тэды шухала шиидхэбэринүүд абтаа. Тодорхойлбол, Романовкада амбулатори баригдаха болоо, тиихэдэ түргэн туһаламжын скорая гэдэг машина үгтэхэ тухай хэлсэгдээ.
Уулзалгануудта хабаадагшадтаа дурадхалнуудшье оруулагдаа. Багдаринда байдаг олзын хэрэг эрхилэгшэ эхэнэр өөрын хүсөөр спортзал барихаар бэлэн байһанаа мэдүүлээ. Теэд проектнэ дансануудыень уласай зүгһөө бэлдэжэ туһалхыень гуйба.
Иимэ үүсхэлые Алексей Цыденов ехэтэ дэмжэжэ, заатагүй туһалхаар найдуулаа. Гадна, Багдаринай аэропортдо АН-2 түхэлэй самоледуудай бааза эмхидхэхэ тухай зүбшэгдөө. Лайнер зониие хангахаһаа гадна, ойн түймэрнүүдые сараха, байгаалияа харууһалха ажалнуудта хабаадуулагдаха зэргэтэй.
Дүтын үдэрнүүдтэ Цыденов ажалаараа Буряадай бусад аймагуудаар ябалгаяа үргэлжэлүүлхэ.
Урид мэдээсэһэнэй еһоор, уласай Баунтын эвенкийска аймагта уранай хэбтэшэ ашаглагдажа эхилээ. Нээлгын еһололдо уранай холдингын «Атомредметзолото» гэжэ бүлгэмэй генеральна директор Владимир Верховцев болон Буряадай толгойлогшын уялгануудые дүүргэгшэ Алексей Цыденов хабаадаа. Ерэхэ жэл түрүүшын малтамалнууд абтахаар хүлеэгдэнэ.