Уласай социальна хамгаалгын болон барилгын яамануудай мэргэжэлтэд үншэн хүүгэдэй шанар муутай гэр абаабди гэһэн гомдолнуудые үзэхэ еһотой.
Улаан-Үдын Сотниково тосхондо гэрнүүдые абаһан үншэн хүүгэдэй хандалгаар ажал ябуулхыень Буряадай толгойлогшын уялгануудые саг зуура дүүргэгшэ Алексей Цыденов даабари үгөө. Энээн тухай захиралта барилгын, социальна хамгаалгын яамануудай хүтэлбэрилэгшэдтэ үгтэхэһөө гадна, Ивалгын аймагай хүтэлбэрилэгшэдэ хандуулагдаа. Үнгэрэгшэ пленарна суглаанда иимэ даабари даалгагдаа.
Уласай засагай газарта тодорхойлһоор, Сотниково тосхоной Залуушуулай микрорайондо баригдаһан гэр байрануудай шанар тухай хэлэгдэнэ. Тэндэ 130 үншэн үхибүүндэ миинтээр гэр байранууд үгтэһэн юм.
Буряадай толгойлогшын уялгануудые дүүргэгшэ үншэн хүүгэдэй байрлаха гэрнүүдые тааруу зохид болгохо талаар хамаг дутуу дундануудые усадхаха тухай тэмдэглээ.
Олондо мэдээсэл тараадаг хэрэгсэлнүүдтэ энээн тухай хэблэлэй гарахада, шалгалта үүсхэгдээ. Шэнэ байратай болоһон үншэн хүүгэд баярлахынгаа орондо бархирнабди гэһэн удхатайгаар гомдолнуудые барижа, лаб 5-ниин гомдолоо мэдүүлээ.
2015-2916 онуудта Улаан-Үдэдэ 254 квартира үншэн хүүгэдтэ баригдаа, тэдэнэй 130-ниинь Сотниково тосхондо бодхоогдоо.
Олондо мэдээсэл тараадаг хэрэгсэлнүүдэй мэдээгээр, 30 гэр бүлэ шанар муутай гэрнүүд руу зөөхэео арсаа. Баригдаһан гэрнүүд хүйтэн, ханануудынь гантажа захаланхай, хүйтэ нойтонһоо углуу тохойнуудаар буртижа, үүдэ үрхэнүүдыншье забһарнуудтайгаар тодхогдонхой гээд тэдэ тодорхойлоо. Тэрээн зуура, Сотниково тосхоной гэрнүүд дулаасуулгын утаһануудта хабаагүй. Тиимэһээ квартирануудые түлеэгээр түлихэ хэрэгтэй.
Гэхэтэй хамта, барилгашадай хэлэһээр, Россин Федерациин барилгын яаманай бүхы эрилтэнүүдэй еһоор эдэ гэрнүүд баригдаа юм байна. Өөрын хүсэ шадалаар таһалгануудые буриһаа аршалһан хэрэгсэлнүүдээр ажаллаха, ханануудаар тараһан нүхэнүүдые бүглэхэ аргатай. Харин бусад дутуу дундануудые ажаһуугшад өөрын эд зөөреор хүсэлдүүлхэ зэргэтэй.