Буряадай толгойлогшын уялгануудые дүүргэгшэ Алексей Цыденов хабартаа саhа мүльһэнэй ехээр хайлажа, уһа голнуудай халиха болон зунай үертэ бэлдэхэ хэрэгүүдтэ бэлдэхээр заабарилаа.
Тиигэжэ мартын 25 болотор Сэлэнгэ мүрэнэй эгээ аюултай, мүльһэ ехэтэй газарнуудта мэргэжэлтэд ажал хэнэ. Тэдэ мүльһэ тайража бага болгоно.
МЧС-эй Буряадай управлениин граждан оборонын болон онсо байдалай талаар агенствын мэргэжэлтэд ерэхэ апрельһаа октябрь болотор байдалые хиналта дороо абажа, үерэй гэнтэ болоо һаань, хойшолнгуудые усадхаха уялгатай.
Буряадай элүүрые хамгаалгын яаман апрелиин 8 болотор эмшэлгын эмхинүүдээ уһанай халиха аюулнуудта бэлэн байлгахаар уялгалагдаа. Илангаяа эм домуудай нөөсэ бэлдэхэ, онсо байдалай газарнуудта хүдэлхэ мэргэжэлтэдээ тодорхойлхо ажалнуудаа лаблаад байхаар уялгалагдаа. Транспортын яаман, харгын албангууд мүн лэ аварийна-һэльбэн шэнэлэлгын ажалнуудта бэлэн байха еһотой.
МВД онсо байдалай тохеолдохо болбол, ниитын гурим сахиха зэргэтэй. Байгаалиин яаман байгаали хамгаалгын албан зургаануудтай эрьенүүдые хамгаалгын даамбануудые шалгаха, аюултай газарнуудые хиналта дороо абаха. Энээнһээ гадна, республикын уһа абалгын 10 нөөсэ бүхэндэ харюусалгата тушаалтад томилогдоо.
Россин байгаали хиналгын албан майн 30 болотор сэбэрэлэлгын түхеэрэлгэнүүдээй рейд үнгэргэхэ, тиин бүхэли зундаа Байгал далайн болон бусад уһа голнуудай уһа хамгаалгын газарнуудые шалгаха. Гадна ариг сэбэрэй гуримуудые сахилга хинагдажа, үерэй газарнуудаар үбшэнгүүдэй тарахагүйн тула хэмжээнүүд абтаха.
Уһанай хажуугаархи нютагуудай ажаһуугшадтай үер тухай һэргылэлгын хөөрэлдөөнүүд эмхидхэгдэхэ. Энэ хэрэгтэ олондо мэдээсэл тараадаг хэрэгсэлнүүд хабаадуулагдаха. Эдэ хөөрэлдөөнүүдэй үедэ мүн лэ эд зөөриео, гэр байраяа страхованиин аргаар аршалан хамгаалха арганууд тухай хэлэгдэхэ.
Гэхэтэй хамта, уһанай аюулай ушарха болбол, сэсэргшэдые хабаадуулха, хэлхеэ холбооной харилсаа тогтоохо, хохидогшодто эдеэ хоол, эгээ хэрэгтэй эд бараа үзүүлхэ талаар бэлэдхэл түсэблэгдөө.
Буряадай толгойлогшын уялгануудые дүүргэгшэ Алексей Цыденов Улаан-Үдын мэртэ, болон ехэ уһатай гол мүрэнүүдэй, далайн эрьеэрхи аймагуудай хүтэлбэрилэгшэдтэ үерһөө хамгаалһан комиссинуудые байгуулха даабари үгөө. Гадна уласай зургаанууд хоорондын комисси байгуулагдажа, үерһөө һэргылэлгын хэмжээ ябуулганууд тодорхойлогдохо болоно.
Версия на русском языке