Байгша оной хуушаар Буряадта автохаргын хоер гараса бии болохо.
Гүрэнэй «Платон» гэһэн системын ашаар суглуулагдаһан мүнгэн зөөреор энэ хэрэг бэелүүлэгдэхэ гээд манай корреспондентдэ Росавтодор эмхи дуулгаа. «Платоной хүүргэнүүд» гээд федеральна харгын агенствэ Кяхтын аймагта Селинга гол дээгүүрхи, тиихэдэ Захааминай аймагай Дутулур-Утаата-Далахай трассаархи Цакирка гол дабаһан хүүргэнүүдые нэрлээ. Улас дотор анха түрүүщынхиеэ гүрэнэй «Платон» системээр объектнууд баригдахань гээшэ гэжэ онсолмоор. Тэдэниие заһабарилхын тула 72 миллион 600 мянган түхэриг шэглүүлэгдээ.
Үшөө урда зуун жэлдэ баригдаад, ашаглагдажа байһан аварийна хүүргэнүүд нэгэш заһабарилагдаагүй байһанаа, мүнөө шэнэлхэ ажалнууд һаял хэгдэжэ эхилээ.
«Эдэ ажалнуудые хэхэдээ, харгынуудые хаангүй, ямаршье бутараан һандараангүйгөөр хүдэлнэбди. Дүүрэхэдэмнай, автомашинануудай гараха арга боломжонууд үргэдхэгдэхэ, ябахань урматай байха, тиигээдшье харгын аюулгуй байдал сахиха талаар һайн болохо», - гээд Росавтодорые ударидагша Роман Старовойт тодорхойлоо.
Нэмэхэ гэбэл, хүүргэнүүдые заһабарилха үнинэй хүлеэгдэһэн мүнгэнэй хангалта ашаанай автомашинануудай киллометр бүхэнэй түлөө түлэдэг түлбэриин ашаар суглуулагдана гээшэ. Иимэ томо машинанууд харгынуудые буталжа эбдэдэг һэн хойноо, эзэдынь заһабарилгада нэмэри мүнгэ оруулдаг болоһон. Тэрэнь налог суглуулбариин аргаар бэшэ, томо ашаанай машинатай олзын хэрэг эрхилэгшэд хэды шэнээн харгыгаар ябагдааб, тэрэл тухай гарзаяа хүсэлдүүлжэ, хубитаяа оруулһан байна.
Версия материала на русском языке
Фото: Сергей Козлов / БУРЯАД YНЭН