«Сэлэнгын ЦКК» гэһэн компанинуудай бүлгэм ВТБ банктай табан жэлээр 1 миллиард 200 миллион түхэриг урьһаламжын дүрбэн хэлсээ баталаа.
Предприятиин үйлэдбэри шэнэдхэн хубилгаха хэрэгтэ энэ мүнгэн һомологдоо гээд мэдээсэгдэнэ. Тус эмхи Буряад уласай Селенгинск тосхоной гол байгууламжа болодог гээд тоотой гээшэ.
Кабанскын аймагаар албанайнгаа хэрэгээр ябахадаа, Буряадай толгойлогшын уялгануудые дүүргэгшэ Алексей Цыденов «Сэлэнгын ЦКК» хүрэжэ, уласай зүгһөө али болохо дэмжэлтэ үзүүлхэ тухайгаа мэдүүлээ. Тэрээн доторнь үйлэдбэридэ хэрэгтэй зүйлнүүдөөр хангаха болон комбинадай хүгжэлтэдэ хабаатай бусадшье асуудалнууд ороно.
«Предприятида ехэ һайн арга боломжонууд бии. Мүнөө дээрээ урагшатай, олзотой хүдэлжэ байна, хүгжэлтын түсэбүүд хараалагданхай. Комбинат ой модоной нөөсэнүүдээр хангадаатай байха еһотой. Энэ манай гол зорилго болоно, тэрээниие шиидхэхэбди. Тэрээн зуура, мэдүүлһэн хэмжүүртөө продукцинуудаа үйлэдбэрилжэ байха еһотой. Энэнь үйлэдбэриие улам ехэ болгожо, ажалай нэмэлтэ һууринуудые байгуулха аргатайбди. Бидэ энэ проектын һайнаар бэелүүлгэдэ тон ехэ һонирхолтойбди. Тиимэһээ уласһаа дулдыдаһан бүхы юумэ хэхэбди»,-гээд Цыденов найдуулба. Регионоо хүтэлбэрилэгшэ 2017 ондо Селенгинск социально-экономическа уридшалан хүгжэлтын дэбисхэр гэжэ зиндаатай болоо гээд һануулаа. Энэнь шэнээр байгуулагдаһан предприятинуудта тусхай налогой гурим олгожо, нилээд хүнгэлтэнүүдые үзүүлнэ.
«Шэнэ инвесторнуудта зохид байдал үзүүлэгдэнэ гээшэ. Тиимэһээ шэнэ үйлэдбэринүүдтэ нэмэлтэ түлхисэ болоод үгэхэ гэжэ найданабди»,-гээд уласаа толгойлогшын уялгануудые дүүргэгшэ тэмдэглээ.
Өөрынгөө ээлжээндэ проектын инвестор Евгений Пруидзе мэдүүлхэдээ, компани үйлэдбэриеэ улам ехэ болгохо хүсэлтэй: «Бидэ дүүрэн зоригтойбди. Энэ проектэеэ бэелүүлхэдээ, жэлдээ 150 тонно хүрэтэр крафтлайнер гаргажа байхаар түсэблэнэбди. Энэмнай 7 миллиард түхэригэй продукци болоно»-гээд тэрэ хэлээ.
«Манай хүгжэлтэ үргэлжэлхэ, эхиниинь табяатай»,-гээд предприятиин гендиректор Лилия Деева нэмэн хэлэбэ.
«Сэлэнгын ЦКК» бүлгэм хадаа Зүүн-Сибирьтэ картон болон гофропродукци гаргадаг эгээ томо үйлэдбэрилэгшэ болоно гээд тэмдэглэлтэй. Жэл бүри гаргадаг картоной таарна продукци 100 мянган тонно хүрэтэр, тиихэдэ гофроподукциин хэмжээн 60 миллион дүрбэлжэн метр хүрэтэр үйлэдбэрилэгдэнэ гээшэ.
Комбинат үшөө 1973 ондо хото байгуулагшын предприятяар ашаглагдажа эхилһэн түүхэтэй. Үшөө тиихэдэ «Сэлэнгын ЦКК» Буряад уласай Кабанскын аймагай Селенгинск тосхондо ажаһуудаг 15 мянган хүн зоной гэр байранудые дулаагаар хангаха үүргэтэй юм.