Буряадай толгойлогшын уялгануудые дүүргэгшэ Алексей Цыденов албанайнгаа хэрэгээр Кабанскын аймагаар ябахадаа, «Сэлэнгын ЦКК» хүрэжэ, тэндэхи үйлэдбэри хараад, предариятиин хүтэлбэрилхы зургаантай нөөсөөр хангалгын, логистикын болон бусад асуудалнуудаар хэлсээ.
Комбинадай генеральна захирал Лилия Деева предприяти доторойнгоо мүнөөнэй байдал тухай хөөрэжэ, Сэлэнгын целлюлоз-картоной комбинадай хүгжэлтын ерээдүйн хараа шэглэлнүүдтэ анхаралаа хандуулаа.
Тус предприяти гофрикартон, гофропродукци болоод ой модоной химическа продукци үйлэдбэрилэн гаргадаг гэжэ тэмдэглэхэ хэрэгтэй.
Деевагай тэмдэглэһээр, физико-механическа шэнжэнүүдээрээ ЦКК-гай картон Россида эрхимүүдэй нэгэн гээд тоологдодог.
Энээнһээ гадна, «Сэлэнгын ЦКК» шанарай программа нэбтэрүүлхэ түсэбтэй, тэрэнэй ашаар, эгээ томо предприятинуудта үйлэдбэриео дурадхадаг эмхинүүдэй тоодо орохо арга олгогдохо болоно.
2016 ондо тус заводто 3 миллион 108 мянга зургаан зуун түхэригэй продукци үйлэдбэрилэгдэжэ ашагдаа гээд мэдээсэгдэнэ. 2015 оной энэл үедэ ороходоо, 119 хахад процентын ургалта туйлагдаа. Тэрээн зуура, байшангуудые болон оньһон түхеэрэлгэнүүдые шэнэдхэн хубилгаха хэрэгтэ оруулагдаһан инвестициин хэмжээн 356 миллион түхэригтэ хүргэгдөө. Хото байгуулагша предприятида даб дээрээ тосхон дотор хүдэлдэг ажаһуугшадай 29% ажал хэнэ.
Генеральна захирал мүн лэ тэмдэглэхэдээ, комбинат дээрэ уһа эрьюулгын хаамал гурим хүдэлдэг, тиихэдэ байгаалида харша нүлөө үзүүлхэ гай тодхорнуудые бага болгохо талаар ажал үргэлжэлүүлэгдэнэ: «Бидэ мүнөө шулуу нүүрһөөр түлидэг котелнуудые модоор дулаа үгэдэгөөр һэлгэхэ проект дээрэ хүдэлнэбди. Энэ зундаа предприятимнай сог суглуулдаг газараа шэнэдхэн хубилгаха ажалдаа орохо хүсэлтэйбди»-гээд тэрэ хэлэбэ.
ЦКК-гай хүтэлбэрилхы зургаан тэмдэглэхэдээ, мүнгэгүй байха болон аргагүй ехэ үри шэридэ абтанхай тон орео байдалай саг үнгэрөө, банкнуудтай хэлсэһэнэй һайгаар, предприяти энэ зундаа хоер цехуудтаа болон ТЭЦ-тэ оньһон түхеэрэлгэнүүдээ шэнэлэн нарижуулжа эхилхэ.
Уулзалгын үедэ комбинадай хүтэлбэрилхы зургаан Алексей Цыденовта түмэр замай станцида контейнерна поезднуудтай хүдэлхыемнай зүбшөөгыт гэжэ хандаба. Юуб гэхэдэ, Тальцыһаа ЦКК руу ашаанудаа ябуулхань ехэ гарзатай байна.
«Энээндэ ори ганса бэрхэшээл тохеолдоходоо болохо,-энэ хадаа Хитадһаа эльгээгдэхэ оньһон түхеэрэлгэнүүд. Уридшалагдаһан хараагаар, контейнернуудтай долоон поезд эльгээгдэхэ. Тэрэниие наашань хүргэхэ, декларацида оруулха хэрэгтэй. Тиимэһээ гансал Тальцы станци хангахаар. Теэд бодожо үзыт, ямар ехэ ашаа Селенгинск хүрэтэр абаашаха болонобиибди? Манай түмэр замай станци иимэ ехэ оньһон түхеэрэлгэ абаха зүбшөөлтэй болоһай гэжэ хүсэнэбди»,-гээд захиралнуудай соведэй түрүүлэгшэ Евгений Пруидзе мэдээсэбэ.
Буряадай толгойлогшын уялгануудые дүүргэгшэ ЦКК-гай эзэдтэ хэлэхэдээ, ямаршье һаа станци, контейнерна поезднуудые абажа шадахал һаа, ехэ хэмжээнэй оньһон түхеэрэлгэнүүдые угтан хангаха аргатай. Тэрээндэ тусхай зүбшэл хэрэггүй.
Мүн тиихэдэ Цыденов «Сэлэнгын ЦКК-дэ» предприятиин хүгжэлтэдэ гаража байгаа тон хэрэгтэй элдэб асуудалнуудые шиидхэлсэхэ, али болохо дэмжэлтэ үзүүлжэ байхаар найдуулаа.