Буряадай промышленностиин болон худалдаа-наймаанай яаман эрдэмэй болон олзын хэрэг эрхилэлгын түлөөлэгшэдтэй ажалай зүблөө үнгэргэбэ.
Дурдагдаһан яаманиие толгойлжо ябаа сайдай уялгануудые дүүргэгшэ Алексей Мишенинай хүтэлбэри доро болоһон энэ суглаанда «сахюур шулуу» үйлэдбэрилжэ, тэрэниие гадаада руу наймаалха арга боломжонууд тухай хэлсэгдээ.
Сугларагшад Буряадта сахюур үйлэдбэрилхэ, тэрэниие болбосоруулха болон тэрээгээр элдэб үйлэдбэри хэхэ комплекс байгуулха асуудалнуудаар хэлсээ. Юуб гэхэдэ, улас дотор сэбэр кварцын аргагүй ехэ хэбтэшэнүүд бии. Тэрэниие промышленностиин элдэб һалбарида хэрэглэхээр.
Сахюур хадаа промышленна үйлэдбэридэ үргэнөөр хэрэглэгдэдэг, дэлхэй дотор эрдэмэй-техническа хүгжэлтын һуури тодорхойлдог гээд тэмдэглэлтэй.
«Сахюур шулуун» гэһэн инвестпроект хүгжэлтын гурбан шата хараална: дээдэ шанарай кварцева холисо абахын тула нөөсэео өөһэдөө нарин һайнаар үйлэдбэрилхэ хэрэгтэй, удаань комплекс байгуулжа, сахюур шулуугаа бүри нягта гүнзэгыгөөр болбосоруулха юм ха. Тиигэжэ сахюур шулуугаар хэдэн шэглэлэй үйлэдбэринүүд гаргагдаха зэргэтэй.