Буряадай ойн ажахын агентсвын хэблэлэй секретарь Александра Егорова мэдээсэхэдээ, таба мянган гектар талмайда аһанхай талын ехэ түймэр Монголһоо улас руу дүтэлжэ ябана.
Даб дээрээ уласай хилэ хүрэтэр 10 модо зайда түймэр хүрөөд байна. Буряадай ойн ажахын агенствэ мүнөө түймэр сараха хамаг хэмжээнүүдые абана, Хяагтын ойн ажахынхид болон ойн харуулшад бэлэн байлгын гуримда оруулагданхай.
«Росси-Монголой хилэдэ ехэ түймэр добтолжо байна. Тэрэ Монголой дэбисхэртэ апрелиин 13-да үзэгдөө»,-гэжэ Егорова сурбалжалагшадта дуулгаа.
Россин МЧС-эй толгойлогшын орлогшо Александр Чуприян Буряадай онсо байдалай талаар комиссиин зүблөө үнгэргөө һэн гээд һануулая. Муниципальна байгууламжануудай хүтэлбэрилэгшэд эндэ мүн лэ хабаадаа һэн. Ойн түймэрнүүдые һэргылхэ болон тэдэниие усадхаха хэрэгүүдтэ зургаанууд хоорондохи харилсаа холбоое улам нягтаруулан эдэбхижүүлхэ тухай шухала асуудалнууд табигдаһан байгаа.
Чуприян тиихэдэ тэмдэглэхэдээ, түймэр сараха хэрэгэй түсэб хадаа ажалай байха еһотой гээд онсолоо һэн. Онсо байдалай тохеолдоо һаа, хамаг хүсэ шадалнууд элсүүлэгдэжэ, ажалдаа хам орошохоор байха уялгатай.
Түймэрнүүдые унтарааха хэрэгтэ зургаанууд хоорондохи харилсаануудые шангаруулха тухай Буряадай толгойлогшын уялгануудые дүүргэгшэ Алексей Цыденовшье хэлээ. Энээндэ хабаатай зургаануудта болон муниципалитедуудай толгойлогшодто тусхай даабаринууд үгтөөтэй.
Буряадай дэбисхэртэ ойн түймэрнүүдэй талаар байдал бараг байна.
Апрелиин 14-эй үглөөнэй мэдээгээр, улас дотор ойн 7 түймэр бүридхэлдэ абтаа гээд мэдээжэ. Дүн хамта 68 гектар талмай галдагдаһан байна.
Энэ жэлдэ эгээ ехэ түймэрынь сэрэгэй полигондо тогтоогдоо.
Буряадта даб дээрээ түймэр саралгын онсо гурим нэбтэрүүлэгдэнхэй.
2016 ондо уласай дэбисхэртэ ойн түймэрнүүдэй тоо 2 хахад дахин үсөөрөө, гал дүлэнэй тараһан талмай 6 дахин шахуу бага болоо гээд бүридхэлдэ абтаа һэн. Тиин, 2016 ондо 623 түймэр бүридхэлдэ абтаа, гэхэ зуура 2015 ондо ойн түймэрнүүдэй тоо 1574 хүрэһэн байгаа. 2015 ондо 900 мянган гектар талмай хосороо, недондо ойн түймэрнүүдһээ 151 мянган гектар тухай талмай хохидоһон байна.