Буряадай толгойлогшын уялгануудые дүүргэгшэ Алексей Цыденов үсэгэлдэр үдэшэ, апрелиин 11-дэ, Худан голой болбосоролой соелой түб хүрэжэ, Худан гол дээгүүрхи хүүргэ барилгые хараа.
Мүнөөдэр, апрелиин 12-то, Цыденов хубиин олзын хэрэг эрхилэгшэдэй фермэнүүдтэ хүрэхэ. Регионой толгойлогшо Хэжэнгэдэ мяха үйлэдбэрилгын арга боломжонуудые элирүүлхэ хүсэлтэй. Тодорхойлбол, тэрэ Эдэрмэгтэ хүдэлдэг мяханай полуфабрикадуудые бүтээн гаргадаг цехэй ажаябуулгатай танилсаха хүсэлтэй.
Тиихэдэ Алексей Цыденовые бериллий олзоборилдог Ермаковска уурхайда хүлеэнэ. Удаань аймагай социальна хэдэн объектнуудые хараха түсэбтэй. Тэрэ тоодо Хэжэнгын лицей, "Хэжэнгэ" гэһэн хүүгэдэй лагерь болон Дээдэ Хэжэнгын һургуули оролсоно. Дээдэ Хэжэнгэдэ баригдажа байгаа спортзалда анхарал хандуулагдахаар хараалагдана.
Хэжэнгэ дээрээ уласаа хүтэлбэрилэгшэ спортивна комплекс барилгын талмай хараха.
Уласай засагай газарай хэблэлэй албанай мэдээсэһээр, Алексей Цыденовай болон тэрэниие дахажа ябаа Буряадай засагай зургаануудай хүтэлбэрилэгшэдэй түсэбтэ ниитын эдэбхитэдтэй, ТОС-уудай түлөөлэгшэдтэй уулзалганууд гол һуури эзэлнэ. Тиихэдэ нютагуудые, эмхи зургаануудые болон предприятинуудые хүтэлбэрилэгшэдтэй сэхэ харилсаанда ехэ анхарал хандуулагдана.
Тиигэжэ нютагай зон Алексей Цыденовта сэхээр асуудалнуудаа табижа, һанаагаа зобооһон бэрхэшээлнүүдээ шиидхэхэ арга боломжонуудые дурадхаха аргатай.