Буряадай толгойлогшын уялгануудые дүүргэгшэ Алексей Цыденов Хориин аймагта Үдэ нютагта ажалаа ябуулдаг «Эзэн» гэһэн дэбисхэртэ ниитэ өөһэдын хүтэлбэриин эдэбхитэдтэй уулзаба.
Ниитэ эдэбхитэд өөһэдынгөө хүсэ шадалаар бариһан түймэр саралгын депо харуулаа, тэрээндээ техникэ абаха талаар туһаламжа үзүүлхыень гуйһан байна.
Алексей Цыденов энэ гуйлтада анхараа хандуулжа, Буряад уласай засагай газарта болон захиргаандаа ТОС-то туһаламжа үзүүлхэ арга боломжо олохыень заабарилба. Мүнөө гүйсэдхэгдэжэ байгаа дэбисхэртэ ниитын хүтэлбэриие дэмжэхэ уласай программаар хангалта үзүүлэгдэхэ хараатай.
«Эзэн» гэһэн ТОС-ой бүридэлдэ 100 шахуу хүн ородог. Эдэ зон байдаг байрынгаа хажуугаархи дэбисхэрые болбосоруулдаг, зохид түхэл маягтай болгодог.
Тиин, ТОС-ой шадалаар «Һолонго» гэһэн амаралтын парк болбосон түхэлтэй болгогдоо, эдэбхитэд Илалтынгаа сэсэрлиг болон хүдөөгэйнгөө соелой байшан заһабарилха хэрэгүүдтэ туһалаа, мүн музей байгуулгада хам оролсожо, хубитаяа оруулалсаһан байха юм.
Олондо туһатай ажалнуудаа ябуулһанай ашаар, ТОС саг үргэлжэ засагай газарайнгаа дэмжэлтэдэ хүртэдэг. Тодорхойлбол, урид түймэр саралгын автомашина абахын тула 400 мянган түхэриг һомологдоо һэн, ажаһуугшадынь тэрэл машинадаа депо бариһан гээшэ.