Буряадай толгойлогшын уялгануудые дүүргэгшэ Алексей Цыденовай hаналаар, региональна хүгжэлтын жасые хүтэлбэрилхэ тушаалда бизнес «нюдэндөө галтай» хүниие зууршалха байгаа.
Буряадай инвестиционно байдал hайжаруулха талаар соведэй зүблөөндэ «Россин тулга» гэhэн ниитэ эмхиин Буряадай региональна таhагай гүйсэдхэхы захирал, региональна инвестиционно стандарт нэбтэрүүлхэ болон тэрэниие бүридхэхэ талаар шэнжэлхы бүлэгые хүтэлбэрилэгшэ Леонид Ивановай хэдэн дурадхалнуудые оруулhанай удаа, уласай толгойлогшо иимэ мэдүүлгэ хээ.
Ивановай тэмдэглэhээр, инвестиционно хүгжэлын гол хараа бодол абтаха еhотой. Ушар юуб гэхэдэ, бизнес Буряадай хүгжэлтын гол бодолые зохеолгодо хабаадаха хамтын ажалда тон эрилтэ ехэтэй, хэрэгтэй байна.
Энээнhээ гадна, Опора России гэhэн эмхиин Буряадай региональна таhагай гүйсэдхэхы захирал нэгэ байшан соо хүгжэлтын бүхы институдуудые хүдэлүүлхэ дурадхал оруулаа. Тиихэдээ олзын хэрэг эрхилэгшэд «нэгэ сонхын» гуримаар хангагдадаг болохо аргатай. Бизнес-инкубаторай байшан эгээл иимэ талмай болохоор тааруу. Тиигээдшье тэндэ мүнөө региональна хүгжэлтын жаса хүдэлнэ гээд Иванов хэлээ.
Энээнhээ уламжалан, Алексей Цыденов Ивановые дурдагдаhан жасые өөрөө толгойлыт гэжэ хандаа.
Энээндэнь Опора России эмхиин Буряадай таhагай гүйсэдхэхы захирал харюусахадаа, дурадхал дээрэ бодожо үзэхэб гээд хэлээ.
Тэрэшэлэн, Алексей Цыденов бизнесай түлөөлэгшэдтэ хандажа, региональна хүгжэлтын жасые хүтэлбэрилэгшын тушаалда өөhэдынгөө кандидадуудые зууршалжа, тэдээн сооhоо одоол тон ехэ «нюдэндөө галтай» хүниие шэлэе гэжэ дурадхаба.
Региональна хүгжэлтын жасые толгойлхо тушаалай сүлөө hуурида нээмэл конкурс апрелиин 13-да дүүрэхэ болзортой гээд тэмдэглэлтэй. Даб дээрээ 5 мэдүүлгэ үгтэнхэй.